حُسنِ مُعاشرت

Husne moashrat

- شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلی اللہ تعالیٰ علیہ وآلہ وسلم كافرمانِ عالیشان ہے:
تم میں سب سے بہتر وہ ہے جو اپنی عورتوں،بچوں ، غلاموں اورلونڈیوں سے اچھاسلوک کرتاہے ۔

- سرکارِ مدینہ ،قرارِ قلب و سینہ ،با عثِ نُزولِ سکینہ صلی اللہ تعالیٰ علیہ وآلہ وسلم کافرمانِ ذیشان ہے:
اپنی عورتوں،اَولاد اور جوبھی اس کی پرورش میں ہے ، ان سے حسنِ سلوک کرنے والے کو راہِ خدا عزوجل میں جہاد کرنے والے کادرجہ عطاکیاجا ئے گا۔

- نبی کریم،رء ُوف رحیم صلی اللہ تعالیٰ علیہ وآلہ وسلم کافرمانِ عالیشان ہے:
زکوٰۃ کے بعد افضل صدقہ وہ درہم ہے جو اپنی جان پر خرچ کرے تاکہ لوگوں کے سامنے سوال کرنے سے بچے اور وہ درہم ہے جو توُاپنے بچوں ،غلاموں اورباندیوں پر خرچ کرے تاکہ
وہ لوگوں کے محتاج نہ ہوں تو اللہ عزوجل اِس کااَجر سَتّر (70) گنا بڑھاکر لکھے گا۔

- حضور نبئ پاک، صاحبِ لَوْلاک، سیّاحِ اَفلاك صلي اللہ تعالیٰ علیہ وآلہ وسلم کا فرمانِ عالیشان ہے:
جس نے حلال روزی کی طلب میں تھکاوٹ کی حالت میں شام کی تاکہ وہ خودکو لوگوں سے سوال کرنے سے بچائے تووہ شام ہی کو بخش دیاجائے گا۔

- نبئ مُکَرَّم،نُورِ مُجسَّم، رسولِ اَکرم، شہنشاہ ِبنی آدم صلی اللہ تعالیٰ علیہ وآلہ وسلم کا فرمانِ ذیشان ہے:
اگرکوئی کسی کاکفیل (یعنی پرورش کرنے والا)ہے تو اس کو چاہے کہ وہ اس کے ساتھ حسنِ سلوک کرے ۔
ایک شخص نے عرض کی:
یارسول اللہ صلی اللہ تعالیٰ علیہ وآلہ وسلم !میری نہ اولاد ہے نہ بیوی اور نہ ہی خاندان ،صرف ایک مرغی ہے۔
آپ صلی اللہ تعالیٰ علیہ وآلہ وسلم نے فرمایا :
اگر توُنے اس کے دانہ پانی میں ایک دن بھی کوتاہی کی تو اللہ تبارک وتعالیٰ تجھے حسنِ سلوک کرنے والوں میں نہ لکھے گا۔

- نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلی اللہ تعالیٰ علیہ وآلہ وسلم کافرمانِ عالیشان ہے:
تم پر یہ لازم ہے کہ اپنی عورتوں پر نرمی ومہر بانی کرو ،نہ ان پر ظلم کرو اور نہ ان پر تنگی کرو اس لئے کہ جب عورت پر ظلم کیاجائے تو اللہ عزوجل ایسا ہی ناراض ہوتاہے جیساکہ یتیم کی وجہ سے ناراض ہوتاہے ۔

- سیِّدُ المبلغین، رَحْمَۃٌ لِّلْعٰلَمِیْن صلی اللہ تعالیٰ علیہ وآلہ وسلم کا فرمانِ خوشبودار ہے:
تم میں سب سے بہتر وہ ہے جو اپنے اہل کے ساتھ اچھاسلوک کرتاہے اور مَیں تم سب سے زیادہ اپنے گھروالوں سے اچھاسلوک کرنے والاہوں اور عورتوں کی عزت صرف کریم شخص ہی کرتاہے اور اُن کی اہانت وتوہین صرف کمینہ وبدبخت ہی کرتا ہے۔

- شہنشاہِ خوش خِصال، پیکرِ حُسن وجمال، دافِعِ رنج و مَلال، صاحب ِجُودو نوال، رسولِ بے مثال، بی بی آمنہ کے لال صلی اللہ تعالیٰ علیہ وآلہ وسلم کافرمانِ عالیشان ہے:
مرد سے سب سے پہلے نمازکاسوال ہوگاپھر اس کی عورتوں، غلاموں اورلونڈیوں کے متعلق سوال ہو گا،
تو اگر زندگی میں ان کے ساتھ حسنِ سلوک اور احسان کیاہوگا تو اللہ تبارک وتعالیٰ بھی اس پر احسان فرمائے گا
اورعورت سے سب سے پہلے اس کی نماز کے متعلق پوچھاجائے گاپھر اس سے اس کے شوہر اور پڑ وسیوں کے حقوق کے متعلق باز پُرس کی جائے گی ۔

- مروی ہے کہ ایک شخص نے سرکارِ والا تَبار، ہم بے کسوں کے مددگار، شفیعِ روزِ شُمار، دوعالَم کے مالک و مختار باِذنِ پروردگار عزوجل وصلی اللہ تعالیٰ علیہ وآلہ وسلم کی بارگاہ میں حاضر ہو کر عرض کی:
یارسول اللہ عزوجل وصلی اللہ تعالیٰ علیہ وآلہ وسلم ! مجھ میں بد خُلقی کی صفت ہے مَیں اپنی زوجہ اور گھر والوں کو زبان سے ایذاء دیتاہوں ۔
آپ صلی اللہ تعالیٰ علیہ وآلہ وسلم نے فرمایا:
اپنے گھروالوں کو ایذاء دینے والے کاکوئی عذر اللہ عزوجل قبول نہیں فرمائے گااورنہ ہی اس کی کوئی نیکی قبول کی جائے گی اگرچہ اس نے ہمیشہ روزے رکھے ہوں اور بہت زیادہ غلام اورباندیاں آزاد کی ہوں اور وہ شخص سب سے پہلے جہنم میں داخل ہوگا۔
اسی طرح جب عورت اپنے شوہر کو ایذایعنی تکلیف دیتی ہے تو اس وقت تک اس کی نمازقبول ہوتی ہے نہ کوئی نیکی جب تک کہ وہ اپنے شوہر کو راضی کرکے اس کے ساتھ اچھی زندگی نہ گزارے۔
یقیناً قیامت کے دن اللہ عزوجل تم سب سے ایک دوسرے کے متعلق پُرسش فرمائے گا۔

- تاجدارِ رِسالت، شہنشاہِ نُبوت، مَخْزنِ جودوسخاوت، پیکرِعظمت و شرافت، مَحبوبِ رَبُّ العزت،محسنِ انسانیت عزوجل وصلی اللہ تعالیٰ علیہ وآلہ وسلم کافرمانِ عالیشان ہے:
مرد پر واجب ہے کہ وہ اپنی زوجہ کونماز پڑھنے کاحکم دے اور اس کے ترک پر سرزنش کرے۔

- اللہ کے مَحبوب، دانائے غُیوب، مُنَزَّہ ٌعَنِ الْعُیوب عزوجل وصلی اللہ تعالیٰ علیہ وآلہ وسلم كافرمانِ ذیشان ہے:
عورتوں کے معاملے میں اللہ عزوجل سے ڈرو کیونکہ وہ تمہارے پاس قید یوں کی صورت میں ہیں، تم نے ان کو اللہ عزوجل کے عہد وپیمان پر لیا ہے اور اللہ عزوجل کے کلمہ (یعنی حکم )کے ذریعے ان کی شرم گاہیں تم پرحلال ہوئیں تم ان کے لباس اورنفقہ(یعنی خرچ اورکھانا وغیرہ )میں وسعت رکھو،اللہ عزوجل تمہارے رزق میں وسعت فرمائے گااور تمہاری عمر میں برکت عطا فرمائے گااور (یاد رکھو)تم جیسا کرو گے اللہ عزوجل بھی ویساہی بدلہ تمہیں دے گا۔